اسلام آباد: پی ٹی آئی رہنما فواد چوہدری نے آڈیو لیک کرنے والوں کے خلاف کارروائی کا مطالبہ کردیا۔
سپریم کورٹ کے باہر میڈیا سے گفتگو کرتے ہوئے فواد چوہدری نے کہا کہ جو آڈیو لیک کررہے ہیں پہلے ان پر ایکشن ہونا چاہیے کیونکہ جب آڈیو لیک کرنے والوں پر ایکشن ہوگا تو اس کے بعد آگے معاملات دیکھے جائیں گے۔
پی ٹی آئی رہنما نے سوال کیا کہ ویسے آڈیو کون لیک کررہا ہے؟کون بھیجتا ہے صحافیوں کو آڈیوز؟
انہوں نے مزید کہا کہ صوبائی اسمبلیاں بحال کرنی ہیں تو پہلے آئین کو ہی ختم کرنا ہوگا، وزیراعلیٰ کے پاس اسمبلیاں تحلیل کرنے کا جو اختیارہے پہلے اسے کالعدم قراردینا ہوگا، ممبران صوبائی اسمبلی نے یہ جانتے ہوئے ووٹ دیا کہ اسمبلیاں تحلیل ہوں گی۔
فواد چوہدری کا کہنا تھا کہ اسمبلیاں تحلیل ہونے کا جانتے ہوئے ووٹ دینے سے بڑا جمہوری عمل کیا ہوگا، اگر اسمبلیاں دوبارہ بحال ہوتی ہیں تو دوبارہ تحلیل کردی جائیں گی۔